Menya akamaro k’urubuto “ Avoka “ rukungahaye kuri byinshi

Ibyo kurya ufata umunsi ku wundi nibyo bigufasha kubaho ubuzima bubi cyangwa bwiza. Ibyo kandi bituma umuntu yibaza ibintu abantu bakwiye kurya mbere na nyuma yo kuva mu mibonano mpuzabitsina bitewe n’intungamubiri bakeneye.

Bivugwa ko abasoje iki gikorwa baba batakaje imbaraga bityo bagakenera vitamini zigarura imbaraga batakaje, kandi zimwe bakenera zikaboneka mu rubuto rwa Avoka.

Ikinyamakuru yatangaje impamvu abamaze gutera akabariro bakwiye gukoresha urubuto rwa avoka n’impamvu badakwiye kurwirengagiza..

1. Imyunyungugu

Uru rubuto rukungahaye ku myunyungugu itandukanye nka Potassium na magnesium bifasha kuzibura imitsi y’amaraso no kurinda umuvuduko w’amaraso ukabije mu mubiri. Iyi myunyungugu kandi ikomeza amagufa n’ingingo muri rusange imbaraga batakaje bakazigarura.

2. Ibimenyetso biryana by’imihango

Kurya avoka bifasha abagore gutuza mu gihe cy’imihango ndetse ikabarinda bya bimenyetso byayo biza mbere bikazahaza bamwe birimo nko kuribwa mu kiziba cy’inda, kuruka, kugira uburakari n’ibindi.

Hari n’abakora imibonano bakaba bajya mu mihango mu gihe kitagenwe, iminsi yabo ikihuta cyangwa igatinda.

Ubushakashatsi bwerekana ko vitamine B6 ibonekamo ishobora kugabanya ibimenyetso biza mbere y’imihango nko kubyimba ibice by’umubiri birimo inda,kugira  umunaniro, no kurakara.

Uyu munaniro ukabije abamaze gukora igikorwa cy’imibonano mpuzabitsina bashobora kugira nk’uko bitangazwa, uru rubuto rukawumara.

3. Kugabanya Stress

Stress cyangwa kujagarara mu mutwe biba kuri bamwe ndetse bikangiza umubano wa benshi kuko nta byishimo wabona muri uyu muntu wagize sitiresi

Kurya avoka kenshi bifasha gusubira ku muronko no gutuza aho kubunza imitima bya hato na hato bishobora kukuviramo kurema amakimbirane n’uwo mwashakanye cyangwa umukunzi wawe.

Ubushakashatsi ku mirire bwemeza ko uru rubuto rudakwiye kuribwa nyuma y’imibonano gusa, ahubwo ko na mbere rwakoreshwa ndetse abahanga mu kwita ku magara yabo bakaba barurya kenshi mu mafunguro bafata.

Benshi bafata avoka bakayivanga n’ibinndi nk’amagi, tungurusumu, imboga za epinary, amavuta ya elayo, umutobe w’indimu, umuntu ibyo bigakora isosi nziza ishyirwa ku yandi mafunguro.

Bamwe bavuga ko babyimba munda igihe bamaze kurya avoka, ariko ntibasobanukirwe impamvu.

Avoka yifitemo amavuta. Ibiribwa by’amavuta nibyiza ko bikoreshwa umuntu ntahite aryama kuko ayo mavuta ananiza igifu kikananirwa gukora igihe umubiri waruhutse.

Nk’uko bisanzwe kuryama ukimara kurya birabujijwe. Igihe noneho ibyo wariye bigizwe n’amavuta menshi ni ngombwa kurindira nk’amasaha abiri n’igice ibiryo bikagera munda.

4. Intangangabo

Avoka yongerera umugabo kugira Intanga zimeze neza binyuze muri vitamini E ndetse na Zink zikagira umwimerere.

Avoka ni isoko ya vitamini zirimo C, E, K, and B6, na riboflavin, niacin, folate, pantothenic acid, magnesium, na potassium. Yifitemo icyitwa lutein, beta carotene, na omega-3 fatty acids bikenewe mu mikorere y’umubiri wa muntu.