Canada: Inkuru y’impamo ni uko umugore wa Minisitiri w’intebe arwaye Coronavirus
Ibiro bya Minisitiri w’intebe wa Canada, Justin Trudeau byemeje ko umugore we Sophie Grégoire Trudeau yasanzwemo icyorezo cya Coronavirus.
Ni itangazo ryagiye hanze kuri uyu wa 13 Werurwe rigira riti: “Nyuma yo gukurikiza amabwiriza y’abaganga, Sophie Grégoire Trudeau yapimwe COVID-19, ibisubizo byagaragaje ko ayirwaye”
Sophie Trudeau yatangiye kugaragaza ibimenyetso bya coronavirus birimo umuriro, nyuma yo kuva mu ruzinduko yagiririraga mu Bwongereza.
Mu itangazo ibi biro bya Minisitiri w’intebe byari byashyize hanze ku wa 12 Werurwe byavuze ko uku kugaragaza ibimenyetso kwa Sophie Trudeau kwatumye na Justin Trudeau yishyira mu kato n’ubwo ibisubizo by’abaganga byari bitaraza.
HuffPost ivuga ko Minisitiri w’intebe Justin Trudeau we nta kimenyetso na kimwe cya Coronavirus aragaragaza.
Trudeau arakomeza imirimo ye mu gihe umugore we yashyizwe mu kato kugira ngo ahabwe ubuvuzi.
