Umuganga mukuru w’indwara zo mu mutwe w’ingabo yafunzwe aregwa ruswa ya miliyoni $1

Ukraine yafunze muganga mukuru w’indwara zo mu mutwe w’ingabo z’icyo gihugu ku birego byo “kwikungahaza mu buryo bunyuranyije n’amategeko”, bijyanye n’amafaranga arenga miliyoni imwe y’amadolari y’Amerika (arenga miliyari 1 FRW) yinjije kuva igitero cy’Uburusiya kuri Ukraine cyatangira muri Gashyantare (2) mu mwaka wa 2022.

Mu itangazo rwasohoye, urwego rw’ubutasi rwa Ukraine (SBU) rwavuze ko uwo mugabo yari ari mu kanama (komisiyo) gafata ibyemezo ku kuba abantu bakomeye kuburyo bashobora kujya mu gisirikare.

Itangazo ry’urwego SBU ntiryavuze izina rye. Ariko umugabo witwa Oleh Druz yavuzwe mbere ko ari we muganga mukuru w’indwara zo mu mutwe w’ingabo za Ukraine.

SBU yavuze ko afite inyubako eshatu z’amacumbi mu murwa mukuru Kyiv cyangwa hafi yawo, imwe mu mujyi wa Odesa, amasambu abiri n’imodoka nyinshi z’akataraboneka zo mu bwoko bwa BMW, ndetse abakora iperereza basatse mu nzu ye banahasanze amadolari 152,000 y’Amerika ‘cash’ (arenga miliyoni 211 FRW) n’ama-Euro 34,000 ‘cash’ (arenga miliyoni 49 FRW).

Iryo tangazo ryavuze ko uwo mugabo atigeze atangaza ko afite iyo mitungo, yari yanditse mu izina ry’umugore we, umukobwa we, abahungu be, n’abandi bantu.

Ubu ashobora gufungwa imyaka 10 ku birego akurikiranyweho byo kwikungahaza mu buryo bunyuranyije n’amategeko no gutangaza amakuru atari yo.

Druz yakurikiranywe muri dosiye isa n’iyo mu mwaka wa 2017, ubwo byamenyekanaga ko atatangaje ko atunze imodoka ebyiri zihenze zo mu bwoko bwa SUV hamwe n’imitungo myinshi, bituma ahagarikwa ku kazi.

Ukraine imaze igihe kirekire ihanganye na ruswa yabaye akarande.

Muri Gicurasi (5) mu mwaka ushize, Depite mu nteko ishingamategeko ya Ukraine yarezwe kunyereza amapawundi 220,000 (arenga miliyoni 378 FRW).

Mu mwaka wa 2023, abategetsi barenga 30 bashinzwe kwinjiza abantu mu gisirikare ku itegeko, bashinjwaga kurya ruswa no guhungisha abantu mu buryo bwa magendu babakura muri Ukraine, birukanwe ku kazi, mu muhate wo guhashya ruswa.

Mu mwaka ushize, inteko ishingamategeko ya Ukraine yatoye ikuraho utunama (komisiyo) tw’abaganga, nyuma yuko abategetsi benshi bashinjwe kwakira ruswa nk’ingurane yo gusonera abantu kujya mu gisirikare.