Ikamyo y’ibitoro yaturitse yica abantu barenga 70 muri Nigeria

Abategetsi bo muri Nigeria bavuga ko ikamyo yari itwaye ibitoro yaturitse nyuma yo gukora impanuka, yica abantu 77 bari bihutiye kujya gutora ibitoro aho byabereye.

Iyo kamyo yibirinduye ejo ku wa gatandatu imena ibyo yari itwaye, mu gace ka Suleja ko muri leta ya Niger iri mu majyaruguru rwagati ya Nigeria.

Abategetsi bavuze ko yaturitse hashize akanya gato abantu batangiye gutanguranwa kuvoma ibitoro, yica abo bantu, naho abandi 25 barakomereka, barimo n’abakora ubutabazi.

Iturika ry’amakamyo atwaye ibitoro n’impanuka z’ibinyabiziga ni ibintu bikunze kubaho muri icyo gihugu cyo muri Afurika y’uburengerazuba – akenshi biterwa n’imihanda mibi n’ibinyabiziga bititabwaho neza.

Ikigo gishinzwe ubutabazi bwihuse cyavuze ko abakomerekeye muri iryo turika barimo kuvurirwa mu bitaro biri hafi aho.

Mu mezi ya vuba aha ashize, ibintu byinshi nk’ibyo byarabaye muri Nigeria.

Mu byumweru bibiri bishize, ikamyo itwaye ibitoro yaraturitse nyuma yo gukora impanuka muri leta ya Delta ikize ku bitoro yo mu majyepfo ya Nigeria, yica abantu nibura batanu.

Abandi bantu nibura 153 barapfuye mu Kwakira (10) kw’umwaka ushize, mu iturika ry’ikamyo itwaye ibitoro ubwo bari barimo bagerageza gutwara lisansi (‘essence’) yari irimo kuva iturutse muri iyo kamyo.

Ibiciro by’ibitoro byariyongereye ku kigero kirenga 400% muri aya mezi 18 ashize nyuma y’ingamba zikomeye z’ubukungu Perezida wa Nigeria Bola Tinubu yafashe, zirimo no gukuraho amafaranga ya nkunganire ya leta yari imaze igihe ishyira mu giciro cy’ibitoro.

Izo mpinduka zatumye abaturage babarirwa muri za miliyoni baba abacyene, bituma benshi bafata ingamba z’amaburakindi kugira bashobore gukomeza kubaho.

Leta ya Nigeria yavuze ko ingamba yafashe zigamije kongerera imbaraga ubukungu.