Leta ya Israel yemeje amasezerano y’agahenge muri Gaza n’irekurwa ry’abashimuswe

Leta ya Israel yemeje amasezerano mashya hagati yayo na Hamas y’agahenge muri Gaza n’irekurwa ry’abashimuswe, bicira inzira ishyirwa mu bikorwa ryayo ku cyumweru.

Icyo cyemezo cyafashwe nyuma y’ibiganiro byamaze amasaha byakomeje kugeza mu ijoro ryacyeye. Abaminisitiri babiri bo mu murongo w’ubuhezanguni mu gukomera ku bya kera batoye banga gushyigikira ayo masezerano.

Mbere, abagize leta ishinzwe umutekano bari batanze icyifuzo ko ayo masezerano yemezwa, ivuga ko “ashyigikiye igerwaho ry’intego z’intambara”, nkuko ibiro bya Minisitiri w’intebe wa Israel Benjamin Netanyahu byabivuze.

Byabaye hashize amasaha ibiro bya minisitiri w’intebe hamwe n’umutwe wa Hamas bavuze ko barangije ingingo za nyuma z’ayo masezerano, iminsi ibiri nyuma yuko atangajwe n’abahuza, ari bo Qatar, Amerika na Misiri.

Bijyanye n’ayo masezerano, Abanya-Israel 33 bashimuswe bagifitwe na Hamas muri Gaza nyuma y’aya mezi 15 intambara imaze, bazaguranwa imfungwa z’Abanye-Palestine zibarirwa mu magana ziri mu magereza yo muri Israel, mu cyiciro cya mbere kizamara ibyumweru bitandatu.

Ingabo za Israel zizanava mu duce dutuwemo mu bucucike two muri Gaza, Abanye-Palestine bavuye mu byabo bazemererwa gutangira gusubira mu ngo zabo, ndetse imodoka z’amakamyo zibarirwa mu magana zitwaye imfashanyo zizemererwa kwinjira muri Gaza buri munsi.

Ibiganiro ku cyiciro cya kabiri – cyitezweho gutuma abashimuswe basigaye barekurwa, ingabo za Israel zose zikava muri Gaza ndetse no “kugarura ituze rirambye” – bizatangira ku munsi wa 16.

Qatar yavuze ko abashimuswe bagiye kurekurwa mu cyiciro cya mbere bazaba barimo “abasivile b’abagore, abasirikare b’abagore, abana, abageze mu zabukuru, n’abasivile barwaye n’abakomeretse”.

Israel ivuga ko abashimuswe batatu bitezwe kurekurwa ku munsi wa mbere w’agahenge, naho andi matsinda matoya y’abantu akazarekurwa bya hato na hato mu gihe cy’ibyumweru bitandatu biri imbere.

Igisirikare cya Israel cyatangiye igikorwa cyo gusenya Hamas – ifatwa na Israel, Amerika n’ibindi bihugu nk’umutwe w’iterabwoba – mu gusubiza ku gitero cyambukiranya umupaka kitari cyarigeze kibaho Hamas yagabye muri Israel ku itariki ya 7 Ukwakira (10) mu mwaka wa 2023, cyiciwemo abantu bagera hafi ku 1,200, naho abandi 251 barashimutwa.

Kuva icyo gihe, abantu barenga 46,870 bamaze kwicirwa muri Gaza, nkuko minisiteri y’ubuzima yaho igenzurwa na Hamas ibivuga.

Benshi mu baturage miliyoni 2,3 ba Gaza na bo bataye ingo zabo, ibintu byarangiritse ahantu henshi, ndetse hari ibura rikomeye ry’ibirirwa, ibitoro, imiti n’ahantu ho kwikinga kubera ingorane ihari yo kugeza imfashanyo ku bayicyeneye.

Israel ivuga ko 94 mu bashimuswe bagifitwe na Hamas, muri bo 34 bifatwa ko bapfuye. Ikindi, hari abasirikare bane ba Israel bashimuswe mbere y’intambara, babiri muri bo bakaba barapfuye.

Ayo matora ya leta ya Israel yari yitezwe kuba ku wa kane, ariko iyo nama yo gutora iratinzwa nyuma yuko Netanyahu ashinje Hamas kwisubiraho kuri bimwe mu byo yemeye muri ayo masezerano. Hamas yahakanye icyo kirego.

Mu masaha yo mu gitondo cy’ejo ku wa gatanu, ibiro bya minisitiri w’intebe wa Israel byatangaje ko itsinda rya Israel riri mu biganiro i Doha mu murwa mukuru wa Qatar ryageze ku musozo w’amasezerano.

Hamas na yo yasohoye itangazo ivuga ko “inzitizi” zari zavutse zijyanye n’ingingo zo mu masezerano, zacyemutse mu gitondo cya kare cyo ku wa gatanu.