Mu buryo busa nk’ubutunguranye, Perezida Tshisekedi na Kagame bahuriye i Doha

Perezida Paul Kagame w’u Rwanda na Félix Tshisekedi wa DR Congo bahuriye i Doha muri Qatar bahujwe n’umukuru w’iki gihugu, bemeranya guhera hano bagakomeza ibiganiro biganisha ku mahoro arambye, nk’uko ministeri y’ububanyi n’amahanga ya Qatar ibivuga.

Kagame na Tshisekedi baherukaga guhura imbonankubone kuri iki kibazo muri Nzeri(9) 2022 i New York bahujwe na Perezida Emmanuel Macron w’Ubufaransa.

Imihate myinshi yo guhuza aba bategetsi yageragejwe n’abandi bahuza mu gushaka amahoro ntiyashobotse kuva icyo gihe.

Guhuzwa na Emir wa Qatar Sheikh Tamim bin Hamad Al Thani, byerekana imbaraga n’ijambo iki gihugu gifite, n’inyungu DR Congo n’u Rwanda bifite mu kubana na Qatar.

Mu ntangiriro z’umwaka wa 2023 Qatar yagerageje guhuza Perezida Tshisekedi na mugenzi we Paul Kagame i Doha ariko ntibyashoboka.

Itangazo rya Ministeri y’ububanyi n’amahanga ya Qatar kuri uyu wa kabiri rivuga ko Kagame na Tshisekedi bumvikanye ku bushake bw’impande zose ku “gahenge ako kanya” nk’uko kasabwe n’inama yahuje imiryango y’ibihugu ya EAC na SADC mu kwezi gushize.

Aba bategetsi kandi bemeranyije gukomeza gushaka amahoro biciye “mu biganiro bya Luanda/Nairobi byavuguruwe bigahuzwa”, nk’uko itangazo ry’iyi ministeri ribivuga.

ONU, DRC, n’ibihugu bimwe byo mu burengerazuba bw’isi bashinja u Rwanda gufasha inyeshyamba za M23. Mu bihe bya vuba aha bishize ntirwabihakanye byeruye cyangwa ngo rubyemere.

Iyi nama y’i Doha yabaye mu gihe kuri uyu wa kabiri havuzwe imirwano muri teritwari ya Walikare hagati ya M23 n’uruhande rw’ingabo za leta.

Dr.Mohammed Al-Khulaifi Minisitiri wa leta ya Qatar ushinzwe ubuhuza no gukemura amakimbirane, yatangaje ku rubuga X ko Qatar yemeza ko ibiganiro ari yo nzira nyayo “yo gukemura ukutumvikana hagati y’ibihugu” no kugera ku mahoro.

Minisitri Al-Khulaifi yavuze ko bashimira aba bategetsi bombi ku guhurira i Doha kandi Qatar bizeye ko “ibiganiro bitaziguye” bizakomeza.

Hagati aho, leta ya Angola yatangaje ko ibiganiro byari biteaganyijwe gutangira i Luanda hagati y’umutwe wa M23 na leta ya Kinshasa bitabaye “kubera impamvu zikomeye”.

Ku wa mbere, umutwe wa M23 watangaje ko utazitabira ibi biganiro byari biteganyijwe uyu munsi, unenga ko abawukuriye bakokeje gufatirwa ibihano n’ibihugu bimwe na bimwe, kandi ko ibyo bigira ingaruka ku muhate wa Afurika wo gushaka igisubizo cy’intambara ya Congo, nk’uko ubivuga.

Leta ya Angola, nk’umuhuza, yatangaje ko “ikomeje imihate yose kugira ngo iyi nama izabe mu gihe nyacyo”, ikongeraho ko ibiganiro “ari cyo gisubizo cyonyine kirambye ku mahoro mu burasirazuba bwa DR Congo”.