Nyuma ya Tshisekedi, abakuru ba Kiliziya Gatolika n’Abaporotestanti babonanye na M23

Musenyeri Donatien Nshole ukuriye inama y’Abepiskopi Gatolika ba RD Congo wari uyoboye itsinda ryahuye n’abakuru ba AFC/M23 i Goma, yavuze ko intambara iriho yarangira habayeho kuganira kw’impande zose.

Iri tsinda ry’abakuru b’Abaporotestanti na Kiliziya Gatolika mu cyumweru gishize ryakiriwe na Perezida Félix Tshisekedi mu biro bye i Kinshasa, rimuha ‘umushinga wo gusohoka mu ngorane’ kandi rivuga ko yawakiriye neza.

Ku wa gatatu i Goma, Musenyeri Nshole yabwiye abanyamakuru ko aya madini yatangiye umuhate wo guhuza umutwe wa AFC/M23 na leta.

Yagize ati: “Uruzinduko rwacu rugamije gushishikariza ibiganiro, kumva ibyo basaba, no kubabwira uburyo bikenewe cyane ko aya makimbirane abonerwa umuti mu mahoro.

“Twemera ko AFC/M23 ishobora kugira uruhare rukomeye muri iyi nzira yo kugera ku mahoro”.

Uruhande rwa leta ya Kinshasa rwaciye umurongo utukura ko rutazigera ruganira n’umutwe wa M23.

Kuganira n’uwo mutwe biri mu byo Kinshasa iheruka gusabwa n’inama y’imiryango y’ibihugu bya EAC na SADC yabereye i Dar es Salaam muri Tanzania mu mpera z’icyumweru gishize.

Mu cyumweru gishize aba bakuru b'amadini bavuze ko bahaye Perezida Tshisekedi 'umushinga wo gusohoka mu ngorane' kandi bavuga ko yawakiriye neza — Mu cyumweru gishize aba bakuru b’amadini bavuze ko bahaye Perezida Tshisekedi ‘umushinga wo gusohoka mu ngorane’ kandi bavuga ko yawakiriye neza

Corneille Nangaa, ukuriye ihuriro Alliance Congo River (AFC), rifite inyeshyambaza za M23, ni we wakiriye aba banyamadini, gusa ntacyo yatangaje ku byo baganiriye.

Kiliziya Gatolika muri RD Congo ifite amateka maremare mu gukangurira demokarasi n’amahoro muri iki gihugu kimaze imyaka igera kuri 30 mu makimbirane acururuka akongera akagaruka, cyane cyane mu burasirazuba bwacyo aho ONU yabaruye imitwe yitwaje intwaro igera kuri 200.

Hagati aho abategetsi ba Kinshasa bakomeje umuhate wo gusaba amahanga gufatira u Rwanda ibihano, barushinja gutera iki gihugu, ibyo u Rwanda rwagiye ruhakana.

Thérèse Kayikwamba avuga ko we na mugenzi we Noël Barrot baganiriye ku "gusaba ibihano" ku bategetsi b'u Rwanda

Minisiteri y’ububanyi n’amahanga ya RD Congo yatangaje ko umukuru wayo Thérèse Kayikwamba ku wa gatatu yabonanye na mugenzi we w’Ubufaransa Jean-Noël Barrot kandi mu byo baganiriye harimo “gusaba ibihano ku bategetsi ba politike na gisirikare” b’u Rwanda.

Mu kiganiro gishya yagiranye n’ikinyamakuru Jeune Afrique, Perezida Paul Kagame w’u Rwanda yavuze ko adafite ubwoba na bucye bwo “gukangishwa ibihano”.