Bukavu: Abasirikare na Wazalendo batangiye kuburanishwa ku bwicanyi n’ubusahuzi

Urukiko rwa gisirikare mu mujyi wa Bukavu ku wa mbere rwatangiye kuburanisha abasirikare na wazalendo barenga 80 baregwa ibyaha birimo kwica abasivile barenga 10, gusahura, gutera impagarara, guhunga urugamba bariho na M23, nk’uko bivugwa n’ibinyamakuru muri DR Congo.

Ibyo byaha bashinjwa kubikora mu mpera z’icyumweru gishize ubwo bavaga ku rugamba muri teritwari ya Karehe.

Bashinjwe ko bahunze urugamba bakerekeza mu duce twa Katana, Mululu, Miti, Murhesa, Mudaka, Kabare na Bukavu bagenda basahura, barasa hejuru, bagatera impagarara muri rubanda.

Muri centre ya Kavumu iri kuri 30km mu majyaruguru ya Goma, abaregwa bashinjwa kwinjira muri bar-restaurant bakambura abantu bakica nibura abasivile barindwi babarashe, nk’uko abategetsi babitangaje.

Guverineri Jean-Jacques Purusi wa Kivu y’Epfo ku cyumweru yari yatanze ubutumwa avuga ko “ntawakwemeza ko ari abasirikare ba leta”, yagize ati: “Birashoboka ko ari amabandi afatira ku buryo ibintu bimeze akagura intwaro agatangira gutera ubwoba rubanda.”

Ku wa mbere mu rubanza i Bukavu, ubushinjacyaha bwa gisirikare bwavuze ko igisirikare kitakwihanganira imyifatire nk’iriya.

Urubanza rwabo ku munsi wa mbere rwagarukiye ku gusobanura imyirondoro y’abaregwa bose hamwe, nk’uko bivugwa n’ishami rya ONU ry’uburenganzira bwa muntu muri RD Congo.

Urubanza rw’abaregwa biteganyijwe ko rukomeza none ku wa kabiri.

M23 ivuga ko nibiba ngombwa ‘izatabara’ i Bukavu

Mu gihe ku cyumweru haranzwe n’agahenge muri rusange ku rugerero rw’intambara hagati y’ingabo za leta n’umutwe wa M23 muri teritwari ya Karehe, ku wa mbere humvikanye imirwano hagati y’agace ka Ihusi na Muhongoza ku muhanda wa Bukavu – Goma, nk’uko amakuru atandukanye abyemeza.

Amakuru avuga ko umutwe wa M23 wagerageje gufata agace ka Ihusi kari ku ntera ntoya uvuye kuri ‘centre ya Kalehe’, gusa kugeza ubu uruhande rwa leta ruvuga ko Ihusi na centre ya Kalehe hakigenzurwa n’ingabo za leta.

Mu itangazo ryo kuri uyu wa kabiri, ihuriro Alliance Fleuve Congo ifite umutwe wa M23 – ivuga ko “yumvise amarira y’abaturage b’i Bukavu” nyuma y’ibikorwa by’ubugizi bwa nabi bakorewe mu mpera z’icyumweru gishize.

Uyu mutwe uvuga ko “ibi byaha bigomba guhagarara, bitabaye ibyo, nta mahitamo tuzaba dufite uretse gutabara abaturage ba Congo”.

ONU na Leta ya Kinshasa bashinja M23 – bavuga ko ifashwa n’ingabo z’u Rwanda – ibyaha by’ubwicanyi ku basivile mu bice yafashe, kwica no gufata ku ngufu abagore muri gereza ya Munzenze y’i Goma, no gufunga inkambi z’impunzi ku gahato no kuzihatira guhunguka.

M23 ihakana ibyo yagiye ishinjwa n’uruhande rwa leta, ivuga ko abantu bapfuye mu ifatwa ry’umujyi wa Goma ari abasirikare ba leta na Wazalendo.

Ihakana kandi ibirego byo gufata abagore ku ngufu n’ubwicanyi ku bagore barenga 100 bari bafungiye muri gereza ya Munzenze y’i Goma.

Mu itangazo uyu mutwe uvuga ko inkambi “impunzi zirimo gutaha iwabo ku bushake”, kandi ko “ntawe uhatirwa gutaha atijejwe umutekano usesuye”

Iri tangazo rya M23 rivuga ko ubwicanyi no gufata abagore ku ngufu no gutwika ibice bya gereza bitakozwe n’abarwanyi bayo, ivuga ko “byabaye iminsi ibiri mbere y’uko bafata umujyi wa Goma”.