Perezida wa Koreya y’Epfo yatawe muri yombi nyuma y’imyivumbagatanyo yamaze amasaha
Abategetsi bo muri Koreya y’Epfo bataye muri yombi Perezida Yoon Suk Yeol, ubu urimo guhatwa ibibazo mu kigo gikora iperereza kuri ruswa kizwi nka CIO (Corruption Investigation Office).
Yavuze ko yemeye guhatwa ibibazo “nubwo ari iperereza rinyuranyije n’amategeko, mu rwego rwo kurinda ko haba imeneka ry’amaraso riteye ishozi”.
Yoon arimo gukorwaho iperereza ku birego byo kwigomeka, nyuma y’igerageza ryamaze igihe gito ryo gushyira igihugu mu mategeko yo mu ntambara mu Kuboza (12) kw’umwaka ushize.
Bubaye ubwa mbere mu mateka ya Koreya y’Epfo Perezida uri ku butegetsi atawe muri yombi.
Abategetsi bashyize mu bikorwa urwandiko rwo kumuta muri yombi, nyuma y’amasaha rwabuze gica hagati yabo, n’itsinda ry’abashinzwe kumucungira umutekano n’abamushyigikiye.
Byabaye ngombwa ko abakora iperereza burira inkuta z’urugo rwe bakoresheje inzego ndetse bakoresha n’ibyuma byo gukata insinga kugira ngo binjire mu rugo rwe.
Hari hashize ibyumweru Yoon yaraheze iwe – mbere yaho muri uku kwezi abakora iperereza bagerageje kumuta muri yombi ariko birabananira.
Iburanisha mu rubanza ku iyeguzwa rya Yoon, w’imyaka 64, rwo gufata icyemezo ku gukurwa ku butegetsi kwe kwakozwe n’inteko ishingamategeko, ryatangiye ejo ku wa kabiri ariko rirangira mu gihe cy’iminota ine kubera ko ataryitabiriye.
Ibitangazamakuru byo muri Koreya y’Epfo byatangaje ko abadepite bo mu ishyaka PPP (People Power Party) rya Yoon riri ku butegetsi, bamaganye itabwa muri yombi rye bavuga ko “rinyuranyije n’amategeko”.
Abo mu ishyaka PPP bari mu bantu bari bateraniye hanze y’urugo rwa Yoon mu gitondo cyo kuri uyu wa gatatu kugira ngo babuze abakora iperereza kumuta muri yombi.
Kweon Seong-dong, ukuriye abadepite b’ishyaka PPP mu nteko, yabwiye inteko ishingamategeko ko ababajwe n’ukuntu ibintu byagenze.
Yagize ati: “Agaciro [icyubahiro] k’igihugu cyacu kangijwe.”
Kweon yongeyeho ko gukomereka kw’umuturage kwabaye mu bushyamirane n’abategetsi, bazakuryoza abakora iperereza n’abapolisi.
Yoon Suk Yeol yageze ku butegetsi mu mwaka wa 2022.
