Beach Volleyball: Amakipe ya Akan na Munezero yegukanye agace ka kabiri

Ikipe ya Paul Akan ukomoka muri Ghana ndetse na Koita Jahara mu bagabo n’iya Munezero Valentine na Mukandayisenga Benitha mu bagore yegukanye agace ka Kabiri ka Shampiyona y’Igihugu y’Umukino wa Volleyball ukinirwa ku mucanga.

Ni irushanwa ryakinirwaga ku bibuga bya King Fisher resort-Rwesero kuva tariki 3 kugeza ku Cyumweru tariki ya 5 Mutarama 2025.

Iri rushanwa ryitabiriwe n’amakipe 22 abagabo n’abagore. Usibye ibihembo bikinirwa muri iri rushanwa, iri rushanwa riri ku rwego mpuzamanga kuko ryemewe n’impuzamashyirahamwe y’umukino wa Volleyball ku isi (FIVB) bityo rikaba ritanga n’amanota ku bakinnyi.

Mu bagabo ikipe ya Paul Akan ukomoka muri Ghana ndetse na Koita Jahara nibo baryegukanye batsinze ikipe ya Ntagengwa Olivier na Akumuntu Kavalo Patrick amaseti 2-0. (21-15, 21-19).

Muri iki cyiciro, ikipe ya Mandela Nzirimo na Revis Niyikiza yegukanye umwanya wa gatatu itsinze David Neeke ukomoka muri Tanzania wakinanaga na Jean Paul Muyisenge amaseti 2-1 (17-21, 21-17, 15-8)

Mu cyiciro cy’abagore, Ikipe ya Munezero Valentine na Mukandayisenga Benitha yongeye kwegukana iri rushanwa ku nshuro ya kabiri yikurikiranya aho kuri iyi nshuro yatsinze ikipe ya Musabyimana Penelope na Amito Sharon amaseti 2-0 (21-16, 21-11)

Muri iki cyiciro, umwanya wa gatatu wegukanywe na Yankurije Francois wakinanaga na Nirere Aliane batsinze amaseti 2-0 ikipe ya Ndagijimana Iris na Sande Meldinah (21-16, 21-08)

Ikipe yabaye iya mbere yahawe Igikombe, imidari ndetse na envelop y’ibihumbo magana atatu (300.000), iya kabiri, ihabwa imidari n’ibihumbi mahana abiri (200.000) naho ikipe yabaye iya gatatu yo ikaba yahawe imidari na envelop y’ibihumbi Ijana (100.000)

Aka gace kujuje akace ka kabiri muri dutatu tugomba gukinwa muri uyu mwaka. Agace ka gatatu kakazaba mu kwezi kwa Gatandatu mu karere ka Rubavu.