Covid-19: Amerika ivuga ko nta gahunda ifite yo gushyiraho passport y’ikingirwa

Ibiro bya perezida w’Amerika bya White House byavuze ko nta gahunda bifite yo gushyiraho itegeko ry’inyandiko z’inzira zemeza ko umuntu yakingiwe coronavirus, bivuga ko kutavogera ubuzima bwite no kubahiriza uburenganzira bikwiye kurindwa.

Gahunda zo gushyiraho ‘passports’ nk’izo zagiye zitangwaho ibitekerezo mu bice bitandukanye byo ku isi, nk’uburyo bwo gukora ingendo mu mutekano ari nako harwanywa iki cyorezo.

Ariko, abanenga inyandiko nk’izo z’inzira bavuga ko zishobora kuba uburyo bw’ivangura.

Amerika yavuze ko itashyigikiye kandi n’ubu idashyigikiye “uburyo busaba Abanyamerika kwitwaza icyemezo”.

Amerika imaze gutangaza abantu barenga 550,000 bapfuye bazize Covid-19, naho abamaze kuyandura muri iki gihugu bagera hafi kuri miliyoni 31 – imibare ya mbere iri hejuru cyane ku isi nk’uko bigaragazwa n’imibare yakusanyijwe na Kaminuza ya Johns Hopkins.

Avugana n’abanyamakuru, Jen Psaki ushinzwe itangazamakuru muri White House yavuze ko nta “bubikwo bw’amakuru ku ikingirwa ku rwego rwa leta” buzabaho cyangwa “itegeko rya leta risaba buri wese kubona icyemezo kimwe cy’urukingo”.

Madamu Jen yongeyeho ati: “Kuri ubu leta ntabwo, kandi nta nubwo, izashyigikira uburyo busaba Abanyamerika kwitwaza icyemezo”.

“Ikidushishikaje nka leta kirasobanutse cyane, kandi icyo ni uko ubuzima bwite bw’Abanyamerika n’uburenganzira bwabo bikwiye kurindwa, no kugira ngo ubu buryo [systems] budakoreshwa ku bantu mu karengane”.

Ibihugu bimwe birimo gushaka uburyo bwo gushyiraho ibyitwa ‘passports’ zo gukingirwa Covid-19, zakoreshwa mu kwerekana ko umuntu ufite iyo ‘passport’ yakingiwe Covid-19, nk’uburyo bwo kongera gufungura mu mutekano uguterana kw’imbaga y’abantu ndetse no gukora ingendo.

Ku wa kabiri, ishamri ry’umuryango w’abibumbye ryita ku buzima (OMS/WHO) ryavuze ko kuri ubu ridashyigikiye izo ‘passports’ mu ngendo, kubera urujijo ruriho ku kumenya niba gukingirwa birinda kwanduza Covid-19, no kubera impungenge ku ivangura.

Hagati aho, Perezida w’Amerika Joe Biden ku wa kabiri yatangaje ko yigije imbere agashyira ku itariki ya 19 y’uku kwezi kwa kane, nk’itariki Abanyamerika bose bagejeje ku myaka y’ubukure bazaba bemerewe urukingo rwa Covid-19.

Yagize ati: “Tugomba kongera uburyo bwacu bwose bwa leta buhuriza hamwe igihugu cyose bukadushyira ku kigero kimwe cyo mu ntambara yo gutsinda bya nyabyo iyi virusi”.

Mbere, yari yavuze ko bitarenze impera z’ukwezi kwa gatatu ari bwo ibyo byari kuba byashobotse. 

Leave a Reply

Your email address will not be published. Required fields are marked *

Share