Covid-19: Urukingo rwa Johnson & Johnson, Ikigo FDA cyasanze nta kibazo ruteza ku buzima

Ibi biciriye inzira ko uru rwaba rugiye kuba urukingo rwa gatatu rwa Covid-19 rugiye kwemerwa gukoreshwa muri Amerika, mu gihe bishoboka ko kibarirwa mu minsi iri imbere.

Uru rukingo rwaba rudahenze ugereranyije n’izindi nkingo za Pfizer na Moderna, kandi rushobora kubikwa mu cyuma gikonjesha gisanzwe (frigo) atari mu cyuma gikonjesha mu buryo bw’umurengera.

Ibyavuye mu magerageza y’uru rukingo byatangajwe na kompanyi Johnson & Johnson mu kwezi gushize.

Kompanyi yo mu Bubiligi Janssen, ifitwe n’iyi kompanyi ikora imiti yo muri Amerika ya Johnson & Johnson, yavuze ko amakuru yayo y’ubushakashatsi yagaragaje ko urwo rukingo rutanga umusaruro wo ku rwego rwo hejuru ku burwayi bukaze.

Ibi bibaye mu gihe ku wa gatatu nabwo Ghana yabaye igihugu cya mbere ku isi kibonye inkingo muri gahunda yo gusaranganya inkingo izwi nka Covax.

Inyandiko yatangajwe n’ikigo cy’Amerika cy’ubugenzuzi bw’imiti n’ibiribwa (FDA), ivuga kuri uru rukingo, itanga amakuru yisumbuyeho ku bijyanye n’ubushakashatsi ikigo Janssen cyagejeje kuri uru rwego.

Ikigo FDA cyafashe umwanzuro ko urukingo rwa Johnson & Johnson rufite “inyungu zizwi” mu kugabanya ibimenyetso bikaze n’uburwayi bukaze bwa Covid-19.

Ibyavuye mu magerageza y’uru rukingo yakorewe muri Amerika, Africa y’epfo na Brazil, bigaragaza ko umumaro warwo kuri virusi ya Covid-19 iri ku kigero kibi cyane “na wo wari uri hejuru”, ariko ko ubwirinzi rutanga muri rusange bwari buri hasi muri Africa y’epfo no muri Brazil, ahamaze kwiganza ubundi bwoko bushya bwa Covid-19.

Amakuru y’ubushakashatsi yagaragaje ko uru rukingo rurinda uburwayi bukaze bwa Covid-19 ku kigero kirenga 85%, ariko rugatanga ubwirinzi kuri Covid-19 muri rusange ku kigero cya 66% gusa, hashyizwemo n’uburwayi bworoheje, hashingiwe ku minsi itari munsi ya 28 abantu baruhawe.

By’umwihariko, nta bantu bapfuye mu bakoreweho amagerageza y’uru rukingo kandi nta wajyanywe mu bitaro nyuma y’iminsi 28 ya nyuma yo kuruhabwa.

Akanama k’impuguke kadafite aho gahuriye n’ikigo FDA biteganyijwe ko gaterana ku wa gatanu kakagira inama ikigo FDA niba cyakwemeza ikoreshwa ry’urwo rukingo, bikaba bishoboka ko rwakwiyongera ku zindi nkingo zigiye gukomeza kwiyongera muri Amerika.

Umutegetsi wo mu biro bya perezida bya White House yavuze ko ubutegetsi bwa Perezida Joe Biden buteganya ko uru rukingo rwa Johnson & Johnson ruramutse rwemejwe n’ikigo FDA, bwakwirakwiza doze zitari munsi ya miliyoni 3 mu cyumweru gitaha.

Iyi kompanyi Johnson & Johnson ivuga ko iteganya ko kugeza mu mpera y’ukwezi kwa gatatu izaba yatanze doze miliyoni 20 z’uru rukingo, bijyanye n’amasezerano yo guha Amerika doze miliyoni 100 bitarenze mu mpera y’ukwezi kwa gatandatu.

Ni ibihe bihugu byamaze gutumiza urukingo rwa Johnson & Johnson?

  • Ubwongereza – doze miliyoni 30
  • Umuryango w’Ubumwe bw’Uburayi (EU/UE) – doze miliyoni 200
  • Canada – doze miliyoni 38
  • Ibihugu bihuriye muri gahunda ya Covax – doze miliyoni 500

Src: BBC

Leave a Reply

Your email address will not be published. Required fields are marked *

Share