U Rwanda rugiye gukoresha internet ya 5G rubikesha amasezerano rwasinyanye na Israel

Leta y’u Rwanda yasinye amasezerano n’iya Israel agamije gusangira inararibonye hagati y’ibihugu byombi harebwa uko ikoranabuhanga ryakomeza kwifashishwa mu iterambere ry’abaturage.

Aya masezerano yashyizweho umukono kuri uyu wa Gatanu hagati ya Minisitiri w’Ikoranabuhanga mu Itumanaho na Inovasiyo, Ingabire Paula na Minisitiri w’Itumanaho muri Israel, Yoaz Hendel.

Biteganyijwe ko azibanda ku ngingo zitandukanye zirimo no kureba uko hakihutishwa ibikorwa byo gukwirakwiza internet yihuta ya 5G.

Minisitiri w’Itumanaho muri Israel, Yoaz Hendel, yavuze ko aya masezerano azimakaza imikoranire yubaka ikoranabuhanga rihuza abantu hagati y’ibihugu byombi.

Yagize ati “Israel yishimiye gusangiza u Rwanda ikoranabuhanga n’ibisubizo bishingiye ku mubano uhuriweho. Aya masezerano ajyanye no guteza imbere ikoranabuhanga no gusangira ibitekerezo by’uburyo ibihugu byombi byakwigiranaho.’’

Yavuze ko uburyo u Rwanda ruhagaze bigaragaza icyerekezo cyarwo binyuze mu gukoresha ikoranabuhanga.

Yagize ati “Niba twita Israel, igihugu cyubatse ikoranabuhanga rihamye, u Rwanda narwo ni igihugu cyihagazeho muri Afurika muri urwo rwego ndetse rushobora no kuba urwa mbere ku Isi, byose bishingira ku bitekerezo n’ubushobozi bwo guhuza abantu.’’

Minisitiri w’Ikoranabuhanga mu Itumanaho na Inovasiyo, Ingabire Paula, yavuze ko binyuze muri aya masezerano u Rwanda ruzigira byinshi kuri Israel.

Yagize ati “Aya masezerano azadufasha gukorana na Israel cyane ko iki gihugu gifite ibihangano bifasha kuzamura ikoranabuhanga mu buhinzi n’ubworozi; azadufasha kureba ibyo bakoze iwabo uko byashoboye kuzamura imibereho y’abaturage tunarebe n’iryo koranabuhanga uko twarizana hano kugira ngo tuzamure imibereho y’Abanyarwanda.’’

“Iyo urebye ibyo bihangano mu buhinzi n’ubworozi, ireme ry’uburezi n’ubuzima ahanini usanga ari bimwe mu bintu twifuza ko twarushaho kwifashisha ikoranabuhanga tugera kuri buri muturage. Ibyo ni byo tubigiraho kuko ni igihugu cyamamaye mu rwego rwo gukoresha ikoranabuhanga.’’

Binyuze muri aya masezerano kandi Abanyarwanda barimo n’abikorera bazafashwa kongererwa ubumenyi n’ubushobozi mu gukoresha ikoranabuhanga.

Minisitiri Ingabire yavuze ko “Ibi bizafasha mu kubakirwa ubushobozi bwo kwishakamo ibisubizo biza bisubiza ibibazo dufite mu gihugu cyacu.

Yavuze ko mu bijyanye n’Itumanaho, ibihugu byombi bizafatanya kugira ngo abaturage bose bagerweho n’iryo koranabuhanga mu cyerekezo cy’igihugu cyo kuba igicumbi cyo guhanga udushya.

Yakomeje ati “Aho tuzakorana harimo no kureba uko hakihutishwa itangizwa gukwirakwiza internet yihuta ya 5G nka moteri iganisha ku kubaka ikoranabuhanga rihamye. Tuzakoresha ubu bufatanye mu kubaka ubushobozi mu bijyanye no guhangana n’ibitero byifashisha ikoranabuhanga, gukoresha ubwenge bw’ubukorano n’ibindi.’’

Amasezerano yashyizweho umukono ashingiye ku kubaka ubushobozi bw’abaturage bijyanye n’ikoranabuhanga rigezweho riri guhindura Isi.

Mu Rwanda 4G yatangijwe mu 2014, ubu 95% by’igihugu bigerwaho n’umuyoboro wa murandasi yihuta mu gihe mu gihugu hose hagera 4G. Muri iki gihe ubu hari ibihugu byatangiye gukoresha internet ya 5G, ifite ubushobozi bwisumbuye bwo kunyaruka.

Leave a Reply

Your email address will not be published. Required fields are marked *

Share