Covid-19: Abageni bahisemo gukizwa n’amaguru nyuma yo gukora ubukwe mu buryo butemewe

Umusore witwa Nash n’umugeni we witwa Tijani Nimatu barirutse barahunga ubwo bari bumvise ko polisi ibashakisha. Ni nyuma yuko bari bamaze gusezerana ku cyumweru tariki 19 Mata kubana akaramata.

Aba bageni bari basezeraniye mu Idini rya Islamu, ubukwe bwari bwatashwe n’abantu 25, aho ibi bitemewe, kuko bari barenze ku mategeko yo kwirinda ikwirakwizwa ry’icyorezo cya Covid-19 mu gihugu cya Ghana.

Igipolisi cyo muri iki gihugu cyatangaje ko aba bombi batangiye gushakishwa ubwo amakuru yari abagezeho ko bari mu masezerano yahuje abantu, ariko nyamara aba bageni baza kwigira inama yo kwiruka ubwo bari bamaze kumenya amakuru y’uko Polisi yahageze kuko bari bumvise urusaku rw’imodoka zabo.

Amakuru dukesha ikinyamakuru 3news.com, avuga ko ibi byabaye ku cyumweru Tariki ya 19 Mata 2020, ubwo aba bakundana biyemeje kurenga kuri aya mabwiriza yo kwirinda Covid-19 kugira ngo bakore ubukwe.

Igipolisi cyatangaje ko aba babiri batumweho ko bitarenze mu masaha 24 bagomba kuba bagiye kwitaba kuri sitasiyo ya polisi, nyamara ntibigeze bajya kwitaba.

Umuvugizi wa Polisi mu gace k’Amajyepfo Supt. Kwabena Otuo yatangaje ko igikurikira aba bombi bajya gushakishwa na Polisi hanyuma bagashyikirizwa urukiko. Babiri mu bari batashye ubu bukwe barafashwe barafungwa harimo uwitwa Iddi Ibrahim na Abubakari Yusif Dauda ariko baje kurekurwa nyuma yo gutanga amande.

Amabwiriza yashyizweho muri iki gihugu guhera tariki 22 Werurwe abuza abantu bageze kuri 25 guteranira hamwe, ni ukuvuga; Ubukwe, inama, amateraniro mu nsengero ndetse n’andi materaniro yose yahuza abantu benshi, mu rwego rwo kwirinda ikwirakwizwa rya Covid-19 muri iki gihugu.

Franco KAYINAMURA

Impuruza.net

Leave a Reply

Your email address will not be published. Required fields are marked *

Share