Icyamamre Idris Elba yatangaje ko nawe icyorezo Coronavirus cyamutashyeho

Icyamamare mu kwandika, gukina no gutunganya filimi, Idris Akuna Elba, yatangaje ko yanduye “Coronavirus”, anasaba abafana be kutababazwa n’ayo makuru ndetse ko hategerejwe ibisubizo byemeza niba umugore we, Sabrina Dhowre, atamaze kwandura nawe.

Idris Elba usanzwe ari n’umuririmbyi akoresheje urukuta rwe rwa Twitter, kuri uyu wa mbere, tariki ya 16 Werurwe 2020, yatangaje ko nyuma yo kubona ko yahuye n’umuntu wanduye iyi virus, yahise yihutira kwisuzumisha none ibisubizo bikaba byagaragaje ko yanduye.

Nubwo nta bimenyetso yari yatangira kugaragaza, Elba w’imyaka 47 y’amavuko yavuze ko yisuzumishije ku wa Gatanu, tariki ya 13 Werurwe 2020, ariko ko nubwo yumva ameze neza yahisemo kwishyira mu kato.

Idris Elba yashyize ubutumwa bw’amashusho kuri twitter yicaye iruhande rw’umugore we Sabrina Dhowre ubwo yatangaga ayo makuru mashya ku bafana be.

Ati “Birakomeye, iki ni cyo gihe cyo gutangira gutekereza ku kutegerana no gukaraba intoki neza, hejuru y’ibyo kandi hakaba hari abantu hanze aha bamaze kwandura ariko bataragaragaza ibimenyetso kandi bashobora gukwirakwiza iki cyorezo mu buryo bworoshye.”

Yakomeje asaba abantu kwirinda ndetse n’ugaragaje ibimenyetso cyangwa azi ko yahuye n’umuntu wanduye, akirinda kubihisha kuko gukorera mu mucyo ari byo asanga byafasha mu kwirinda ikwirakwira ry’iki cyorezo gihangayikishije isi.

Ati: “Iki ni igihe cyo gushyira hamwe hagati yacu. Hari abantu benshi bamaze gufatwa ndetse hari n’abamaze kubura ubuzima bwabo cyangwa ubw’ababo, uku ni ukuri.”

Yasabye abafana be kutagira impagaragara ndetse ko akomeza kubabagezaho uko amerewe.

U Bwongereza igihugu Idris Elba akomokamo kiri ku mwanya wa 10 ku rutonde rw’isi rw’ibihugu bimaze kugaragaramo ubwandu bwinshi bwa Coronavirus, aho hamaze kubarurwa abagera ku 1 543, abakize bo bagera kuri 55, mu gihe 52 bamaze kwitaba Imana.

Aya makuru aje nyuma y’icyumweru kimwe undi muntu wamamaye mu ruganda rwa sinema,Tom Hanks n’umugore we, Rita Wilson, basanzwemo coronavirus aho bari mu biruhuko muri Australie. Uwo Mugabo wakinnye filimi yitwa ‘Forrest Gump’ n’umugore we, bombi bafite imyaka 63, bagaragaye mu butumwa banyujije kuri Instagram basaba abantu kwirinda.

Idris Elba wishyize mu kato kubera indwara ya Coronavirus n’ubwo atari yagaragaza ibimenyetso byayo

Franco KAYINAMURA

Impuruza.net

Leave a Reply

Your email address will not be published. Required fields are marked *

Share