Perezida w’inzibacyuho wa Guinée Bissau yeguye nyuma y’iminsi ibiri mu kazi

Perezida w’Inzibacyuho wa Guinée Bissau, Cipriano Cassama yeguye ku nshingano yari amazeho iminsi ibiri nyuma yo gukangishwa ko azicwa.

Uyu mugabo yemeje ubwegure bwe mu itangazo rigenewe abanyamakuru yashyize ahagaragara.

Ni itangazo rigira riti: ” Nshingiye ku kuba abashinzwe kundindira umutekano bankangisha kunyica, nafashe icyemezo cyo kwegura ku mwanya wa perezida w’inzibacyuho nahawe, mu rwego rwo kwirinda imeneka ry’amaraso muri Guinée Bissau.”

Cassama yongeyeho ko ubuzima bwe n’ubw’umuryango we buri mu kaga, ari yo mpamvu yafashe uriya mwanzuro uremereye.

Cyakora cyo n’ubwo uriya mugabo yavuye muri perezidansi, yavuze azagumya kuyobora ishyaka National Assembly akuriye. Ku wa 28 Gashyantare ni bwo Cassama yari yahawe ziriya nshingano, nyuma y’uko ishyaka rye ryari rimaze gutsindwa mu matora y’abagize inteko ishinga amategeko.

Ishyaka PAIGC ryari riri ku butegetsi kuva mu 1970 ni ryo ryegukanye intebe nyinshi mu nteko aho ryatanzemo abadepite 54 mu badepite 102 bari bakenewe, gusa na ryo ntiryegukana insinzi mu matora y’umukuru w’igihugu.

Aya matora y’abadepite yasize aharuriye inzira Sissoco Embalo wo mu batavuga rumwe n’ubutegetsi abaye Perezida wa Repubulika, nyuma yo gutsinda ikiciro cya kabiri cy’amatora y’umukuru w’igihugu n’amajwi 53.55.

Yari ahigitse Domingos Simoes Pereira wagize amajwi 46.35%.
Pereira yashinje Komisiyo y’amatora kumwiba amajwi, biba ngombwa ko urukiko rw’ikirenga rutegeka ko Komisiyo yongera kubarura amajwi, gusa iri teka ntacyo ryakemuye hagati ye na Embalo wari wamaze kurahirira kuyobora Guinée Bissau.

Leave a Reply

Your email address will not be published. Required fields are marked *

Share