Minisitiri Busingye yavuze ko hagiye gufatwa ingamba ku bahisha amakuru y’ahari imibiri y’abazize Jenoside

Minisitiri w’Ubutabera akaba n’Intumwa Nkuru ya Leta, Busingye Johnston, yavuze ko bagiye guhagurukira ikibazo cy’abantu banga gutanga amakuru y’ahashyizwe imibiri y’Abatutsi bishwe muri Jenoside kuko birambiranye guhoza ababuze ababo mu gihirahiro.

Yabivuze kuri iki cyumweru ubwo yari yitabiriye umuhango wo kwibuka abazize Jenoside yakorewe Abatutsi i Murambi mu Karere ka Nyamagabe.

Uwo muhango wabereye ku Rwibutso rwa Jenoside rwa Murambi ahashyinguye imibiri y’abazize Jenoside isaga ibihumbi 50 bahiciwe ubwo bari bahahungiye mu gihe cya Jenoside yakorewe Abatutsi.

Kuri iki Cyumweru hashyinguwe mu cyubahiro indi mibiri 294 yavanywe mu rwibutso rwa Gasaka.

Havuzwe ku kibazo cy’abantu bakinangira gutanga amakuru y’ahashyizwe imibiri y’abishwe muri Jenoside yakorewe Abatutsi.

Rwamuhizi Fidèle wari uhagarariye imiryango yashyinguye abayo yabajije niba ‘nta cyakorwa ngo abagihisha amakuru bayatange’. Yatanze urugero rwo ku Bitaro bya Kigeme ahiciwe abatutsi benshi bari bahahungiye.

Ati “Ejo bundi twabonye ibintu bibera Kigeme bituma twongera kwibaza. Abantu biciwe ku Kigeme kandi abahakoraga icyo gihe barahari, bataburura umwe abereka aha undi abereka ahandi babazutaguza. Hakorwa iki kugira ngo abo bahakoraga ko bahazi ngo baherekane neza? Ntitubabwira ngo babazure ariko tubashyingure mu cyubahiro turuhuke.”

Iki kibazo cy’abantu banga gutanga amakuru y’ahashyizwe imibiri y’abazize Jenoside yakorewe Abatutsi kimaze igihe kinini kivugwa hirya no hino mu gihugu.

Minisitiri w’Ubutabera, Busingye Johnston, yakivuzeho yizeza ko bagiye kugihagurukira hagafatwa ingamba.

Ati “Hari ibibazo bavuze n’ahandi duhura na byo by’abantu biba bizwi cyangwa bigaragara ko bazi ukuri ariko ntibakuvuge kose cyangwa ntibavugeho na busa tukaguma muri icyo gihirahiro, iki na cyo ni ikibazo tugiye guhagurukira tugashaka ingamba zikwiye kugira ngo turebe ko twagira icyo tugeraho. Turaza kugikurikirana dufatanyije twese.”

Kayitaba Michel watanze ubuhamya yavuze ko hari abantu bo mu muryango we bagera kuri 17 biciwe i Murambi no mu nkengero zaho ariko atazi neza niba bose bashyinguye mu rwibutso ruhari asaba ko abafite amakuru yuzuye bayatanga.

Urwibutso rwa Jenoside rwa Murambi mu Karere ka Nyamagabe ruruhukiyemo abishwe muri Jenoside ubwo bari bahungiye mu ishuri ryigishaga imyuga ryari ryaratangiye kuhubakwa.

Rufite amateka yihariye kuko rugizwe n’ibice bine bigaragaza amateka ya Jenoside yakorewe Abatutsi.

Igice cya mbere cyerekana uko u Rwanda rwayobowe kuva ku Ngoma ya Cyami kugeza kuri Jenoside yakorewe Abatutsi, n’uburyo Ingabo zari iza FPR Inkotanyi zayihagaritse.

Icya kabiri ni imva rusange ishyinguyemo imibiri y’abishwe muri Jenoside, naho igice cya gatatu kigizwe n’ibyumba birimo imibiri yatoraguwe itarangirika mu gihe igice cya kane kigaragaza ibyobo byari byarajugunywemo abahiciwe ndetse n’ibibuga abasirikari b’Abafaransa bari barubatse iruhande rw’ibyo byobo.

 

Murenzi Yannick

Impuruza.net

Leave a Reply

Your email address will not be published. Required fields are marked *